K-LINK dari NIPA

004-2025

Oktober 2024 semalam ulun umpat program pelatihan dari National IT Promotion Agency, Korea Selatan ngarannya K-LINK. Program ngini sebujurnya program dari pemerintah Korea Selatan gasan bubuhan yang rancak behubungan lawan pihak Korea Selatan. Pas banar ulun 2024 semalam itu ada hubungan lawan buhan Korea gasan menggawi program kerja sama Korea-ASEAN Digital Academy.

Program ngini barian pemerintah Korea gasan buhan negara ASEAN (ASEAN Members State/AMS) gasan pelatihan AI selawas 300 jam pelajaran atawa kakurang labihnya 3.5 bulan. Hampir sama lah wan pelatihan 1 semester di kuliah. Imbah itu buhannya disalurkan gasan bagawi di Korea sana.

Buhan Korea ni maju pang nya, tapi kededa yang mau bisi anak. Bekawinan aja jarang, paling 20%nya. Dari yang bekawinan tu, yang bisi anak jarang jua ulun tahu pas bapanderan lawan buhan Korea. Ada pang 50%nya yang mau bisi anak. Itu gin seikungan aja. Makanya buhannya ni gair 20 tahun lagi Korea ni kededa penerusnya. Lain pang lawan buhan kita ni. Bebaya COVID semalam ja kekanakan SD wan SMP di Hulu Sungai tu nah, dikawinakan lawan kuwitannya. Mana banyak pulang ketuju bisi kekanakan. Bebanding tabalik lawan bahan Korea, jadi buhannya ni malatih buhan kita gasan bagawi di sana. Nah bebalik lagi kesah K-LINK itu apa gerang

Apa jar K-LINK ni?

K-LINK ngini sebujurnya pelatihan gasan buhan pemimpin di sektor masing-masing. Sama ja nengkaya program International Visitor Leadership Program (IVLP), program ngini harus ada rekomendasi dari buhan Korea. Nah ulun semalam dapat surat rekomendasi dari konselor Korea-Mission to ASEAN yang di Jakarta. Inya membawah ulun handakkah jar pelatihan di Korea 2 minggu, dibayari pulang. Bah jar ulun menggerunum dalam hati, mau ai. Habis itu draft rekomendasinya ulun isi, ulun bari ke isya gasan ditandatangani. Kada berapa lawas, ada pang 2 minggu dapat surat undangan dari Direktur NIPA gasan pelatihan 2 minggu ke sana. Himung banar. Tekerinyum. Kujihing-kujihing dapatnya. Ulun 2 minggu ke Korea neh bulan kena. Jadi kaya ini tahapannya.

1. Minta surat rekomendasi dari counterpart di Korea. Mun akrab, mintai ja suratnya.
2. Belelihat di web nya handak umpat kursus yang mana. Jar ulun, ambil kursus di bulan Oktober akhir, pas musim semi. Kursus apa ja kada pengaruh julak ai. Yang penting kam bisa merasai musim semi.
3. Bis tu, belajar online dulu berataan kursus yang pian daftar tadi sampai dapat sertifikat onlinenya.
4. Surat rekomendasi wan sertifikatnya itu pian email ke panitianya
5. Hadang ja bebaya 2 minggu kena dapat undangan. Tapi ini jua untung-untungan lah. Ada jua yang ditolak karena ikam kada talalu penting atau lain key-person jar buhan Korea.
6. Habis itu isi borang gasan visa wan tiket.

Beapaan

Nah di sana beapaan aja. Yang ulun ingat:

1. Kuliah umum dari bahan profesor di sana. Waktu itu ulun maambil topik Artificial Intelligence of Things (AIoT). Ilmu terkait AI + IoT. Jadi AI ngitu diandak di perangkat-perangkat, kada terpusat lagi.
2. Mahadiri seminar lawan pameran. Pas banar ada pemeran AIoT waktu itu 2 hari lawan ada seminar. Bebahasa Korea pang, ulun pina unggut-unggut aja paharat mengerti. Tapi nyamannya ada Google Translate wan Event Cat wahini, jadi otomatis bisa langsung diterjemahkan. Buhan Korea nih lah yang ulun lihat cangkal-cangkal. Pas di seminar banyak banar yang hadir, rasa ingin tahunya tu tinggi banar, lawan daya saingnya pina kada mau kalah. Pas di pameran jua, barang-barangnya bagus-bagus. Ada yang laporan keuangan berbasis AI, jadi kada ngalih lagi maambil keputusan, langsung diolah lawan AI. Bis tu ada jua alat-alat kedokteran berbasis AI nengkaya deteksi Aritmia Jantung 10 detik ja. Deteksi gula darah wan potensi penyakit, semenit ja. Banyak pang yang bagus-bagus. Jauh banar ketinggalannya Indonesia ni.
3. Bakunjangan ke pemerintah Korea. Waktu itu buhan kami ni ke KOAT(Korea Agriculture Technology Promotion Agency) di Jeollabuk-do. Itu di Selatan banar handak ka Busan. Jauh banar, ada 3 jam be-bis. Tapi ngarannya jalanan di Korea ni bagus kam, kededa lunyut-lunyut nya, rata berataan, jadi kada berasa sampai sana.
4. Cultural event. Nah ini bekunjangan ke tempat wisata ja gasan mengenal budaya Korea. Waktu itu rencananya ke DMZ, tapi kada jadi soalnya pas itu ada drone Korea Selatan ditembak Korea Utara. Situasinya jadi tegang dan DMZ ditutup seminggu.
5. Acara bebas Sabtu-Minggu. Buhannya yang lain ada yang ke Busan, ada yang bekunjangan ke tempat wisata. Mun ulun ada kenalan urang Korea dibawai hiking.

Buhan yang Umpat

Pesertanya pas waktu ulun waktu itu dari Nigeria, Kyrgyztan, Azerbaijan, Mongolia, Nepal, Bangladesh, Thailand, Kamboja, Laos, lawan Indonesia. Paling banyak buhan Indonesia be-empat. Buhan Kyrgyztan, Azerbaijan, Mongolia ini bahasanya sama, jadi biasanya pas makan siang buhannya semeja. Thailand, Kamboja, wan Laos jua sama bahasanya jar, jadi rancak semeja. Sama ja bahasa Banjar dialek Hulu Sungai, lawan bahasa Banjar di hilir, atau Jawa Tengah wan Jawa Timuran. Mayoritas buhannya paham, tapi dikit-dikit ja bedanya. Nah jadinya bahan Indo, Nigeria, wan Bangladesh yang bekumpulan. Pas jua berataan Islam.

Waktu itu ulun menginapnya di Lotte World Hotel, Seoul. Pas banar lawan tengah kota, nengkaya SCBD nya Jakarta. Kemana-mana parak ja. Dihiganya ada nengkaya Dufan tuh, gasan kekanakan. Nah pas sebulan sebelum berangkat tuh, bini ulun jar handak umpat jua. Padahal jar panitia kada bulih jar membawa keluarga. Bah ya am jar ulun. Maka sekamar serongan ja. Sayang lo mun kada bawa keluarga. Akhirnya, jadi ja bini wan anak yang halus berangkat, jadi ulun berangkat dulu 3 hari, melihat sikon mun jua kawa diandak di kamar kan. Maurus tiket, visa, dan lain-lain. Alhamdulillahnya visa diterima. Tiket pesawat jua pas kada larang. Jadi ai “menyelundupkan” bini wan anak supaya kada ketahuan panitia di hotel. Bejalanan ai kami ke Seoul sekeluarga minusnya anak yang ganal kada umpat soalnya lagi di asrama.

Kayapa

Nah kaya tu pang kesah program K-LINK. Intinya program ini gasan buhan calon pemimpin yang rancak behubungan lawan Korea Selatan. Banyak tumpat buhan dari luar negeri juga, jadi gasan jejaring internasional kita. Habis itu kita jua dibari uang saku per-hari gasan konsumsi. Ulun himung pang bisa dapat ilmu, dapat jejaring, dan yang kada kalah penting kawa membawai anak-bini bejalanan walaupun harusnya jangan ditiru.